1. Бош сахифа
2. Янгиликлар

Фурқат туманида ҳам қишлоқ хўжалиги ходимлари куни нишонланди

×

Бугун Фурқат туманида Қишлоқ хўжалиги ходимлари кунига бағишланган тантанали байрам тадбири ўтказилди. Унда ризқ-рўз етиштирувчи деҳқонлар, соҳа ходимлари ва туман аҳлининг меҳнати яна бир бор улуғланди. “Наво” тантаналар саройида ташкил этилган байрам тадбирига соҳа фидойилари, фахрийлар, илғор фермер ва деҳқон хўжаликлари меҳнаткашлари, сектор раҳбарлари, агрокластер масъуллари таклиф қилинди. 
Тадбирда сўз олган мутасаддилар қишлоқ хўжалиги миришкорларини байрам билан самимий қутладилар. Ғайратли, шижоатли фермерлар, томорқа ер эгалари ва уларга яқиндан кўмакчи сувчи-ю, механизаторларнинг мўл-кўл маҳсулотлари етиштириб келинаётганлиги туфайли бугун дастурхонларимиз тўкин, хонадонларимиз обод, турмушимиз фаровон эканлигини таъкидланди.
Тантанали тадбирда қишлоқ хўжалиги ривожини янги босқичга кўтариш, барча турдаги экинлардан юқори ва сифатли ҳосил етиштириб, эл-юрт фаровонлигини юксалтиришга қўшган муносиб ҳиссалари учун “Нурматов Шарифжон” деҳқон хўжалиги раҳбари Ш.Нурматовга “Меҳнаткаш деҳқон”,  “Узоқов Мухамадали замини” фермер хўжалиги раҳбари М. Ориповга “Илғор фермер”, “Расулов Хусанбой” деҳқон хўжалиги раҳбари Х. Расуловга “Меҳнаткаш деҳқон”, шахсий томорқа эгаси Я.Юнусовга  “Намунали томорқачи”, “Интеграл” фермер хўжалиги раҳбари И. Қодировга “Илғор фермер”, “Мархаматой” фермер хўжалиги раҳбари Қ.Хожиматовга “Илғор фермер”, шахсий томорқа эгаси М. Хамидовга “Намунали томорқачи” кўкрак нишонлари топширилди. Туман сув хўжалиги бўлими бошлиғи М.Мадаминов ҳамда қишлоқ хўжалиги бўлими бошлиғи Т.Сиддиқовларга эса вилоят ҳокимлигининг фахрий ёрлиқ ва ташаккурномалари тақдим этилди.  
Шунингдек, мавсум давомида юқори ҳосилдорликларга эришишга муносиб ҳисса қўшган илғор фермерлар, сувчи-механизаторлар, дала меҳнаткашлари ва терим отряд фаоллари туман ҳокимлиги, “Feyxan teks” МЧЖ пахтачилик кластери ҳамда бошқа ҳамкор ташкилотларнинг фахрий ёрлиқ ва эсдалик совғалари билан тақдирланди.
Элимиз ардоғидаги санъаткор Хуршид Расулов, Сардорбек Расуловлар томонидан намойиш этилган концерт дастури ҳосил байрами қатнашчиларига кўтаринки кайфият бағишлади.