Qo‘shtepa tumanidagi Madaniyat markazida O‘zbekiston Jurnalistlari ijodiy uyushmasi a’zosi, ustoz jurnalist Xadichaxon Karimovaning ijodiy kechasi o‘tkazildi. Xadichaxon Karimova sohaning musahhixlikdan bosh muharrirgacha bo‘lgan yo‘lini bosib o‘tgan zahmatkash, faol, ma’naviy yetuk, o‘z kasbini sevgan, boshqalar dardi-yu quvonchini o‘ziniki deb bilgan, har soniyada yangilikdan xabardor bo‘lishni, axborot texnologiyalarni o‘zlashtirishni muhim hisoblab ijod qilayotgan jonkuyar jurnalistlardan biridir. Ustoz jurnalist Xadichaxon Karimova Qo‘shtepa tumani hokimligi muassisligidagi “Istiqbol yo‘li” gazetasida bosh muharrirlik qilib keldi. Fidoyi jurnalist 52 yillik mehnat faoliyati davomida “Mehnat shuhrati” ordeni, “Shuhrat” medali, “O‘zbekiston mustaqilligiga 15 yil”, “O‘zbekiston mustaqilligiga 25 yil”, “O‘zbekiston Konstitutsiyasiga 25 yil” hamda “Moʻtabar ayol” ko‘krak nishonlari bilan taqdirlangan. Bugun bo‘lib o‘tgan tadbirda viloyat va tuman hokimligining mas’ullari, tumandagi mas’ul idoralarning rahbarlari, keng jamoatchilik vakillari, ijodkorlar hamda ommaviy axborot vositalari vakillari, shuningdek, ustozning yaqinlari va shogirdlari ishtirok etdilar. Tadbirda so‘z olgan viloyat hokimining yoshlar bilan ishlash bo‘yicha o‘rinbosari Sherzod Polvonov Xadichaxon Karimovaning ijod yo‘li va shu sohada erishgan yutuqlari haqida gapirdi. Ustozning mehnatlari e’tirof etilib, viloyat hokimining “Faxriy yorlig‘i” va esdalik sovg‘alari topshirildi. Ijodiy kechani O‘zbekiston jurnalistlar uyushmasi viloyat bo‘limi raisi, O‘zbekistonda xizmat ko‘rsatgan jurnalist Muhammadjon Obidov olib bordi. Tadbir davomida so‘z olgan tuman hokimi Anvarjon Abdullayev, shoira Zuhraxon Aliyeva, viloyat “Oqila ayollar” harakati rahbari Yulduzxon Rahimova hamda tumanimizdagi mehnat faxriylari Isroiljon Ismoilov, Yusufjon Roziqov, Karomatxon Ummatqulova, Madaminjon Toshmatov, ustozning shogirdlari iste’dodlari shoiralar Muniraxon Qo‘qonova, Dilnavoz Qo‘ldosheva va boshqalar fidoyi jurnalist Xadichaxon Karimovaga ehtirom ko‘rsatishdi. Ular so‘zlarida Xadichaxon Karimova o‘ziga xos ijod yo‘liga, o‘z uslubiga ega ekanligini ta’kidlashib, ustozning faoliyati, ijod yo‘li haqida batafsil so‘z yuritishdi.